Iki giterane kizaba ku wa 15 no ku wa 16 Kanama 2026, muri ADEPR Ruhangiro, buri munsi kikazatangira saa Mbiri za mu gitondo kugeza saa Kumi n’Ebyiri z’umugoroba.

“Bethania Day” igiye kuba ku nshuro ya gatatu, ikaba izarangwa n’ibihe byo kuramya no guhimbaza Imana, gusenga ndetse no kwigishwa Ijambo ry’Imana.

Bethania Choir ivuga ko ari umwanya wo gukomeza umurimo w’ivugabutumwa no guhuriza hamwe abakristo mu mwuka w’ubusabane.

Muri iki giterane hazitabira abakozi b’Imana batandukanye, barimo Ev. Ngendahimana Jean Bosco, Ev. Uzamuranga Donatha, Pastor Kanobana Jean Baptiste na Ev. Munyampirwa Serge, bazatanga ubutumwa mu minsi ibiri y’iki gikorwa.

Amakorali yatumiwe arimo Rehoboth Choir, Abategereje Choir, Umubwiriza Choir yo mu Rurembo rwa Rubavu ndetse na Korali Inkuru Nziza ya ADEPR Rugando yo mu Mujyi wa Kigali.

Mu kiganiro na Paradise, Bethania Choir yararikiye abantu bose bifuza kwifatanya na yo muri iki gikorwa, ibasaba kuzitabira hakiri kare no kubahiriza amasaha y’igiterane kugira ngo bose bafatanye mu kuramya no guhimbaza Imana.

Alicia Ufitimana na we ari mu bagize Bethania Choir

Muri Bethania Choir harimo kandi Alicia Ufitimana, umwe mu bagize itsinda rya Alicia & Germaine, itsinda ry’abakobwa babiri bavukana bakomoka mu Karere ka Rubavu, bamaze kumenyekana mu muziki wo kuramya no guhimbaza Imana.

Alicia & Germaine bazwi mu ndirimbo zirimo “Rugaba”, “Uri Yo”, “Ibendera” na “Ibanga”, ndetse bakomeje gukundwa n’abakunzi b’umuziki wa Gospel mu Rwanda no hanze yarwo.

Mu butumwa bw’amashusho Alicia yanyujije ku mbuga nkoranyambaga, yararikiye abantu kwitabira “Bethania Day”, avuga ko hazaba abavugabutumwa ndetse n’amakorali atandukanye. Ati: “Ntimuzabure pe, muzaze tubane.”

Bethania Choir ifite amateka yo gutegura ibiterane bigamije guhuriza hamwe abakristo no gushimira Imana ku byo yabagejejeho.

Ku wa 22 Ukuboza 2024, iyi korali yakoze igiterane yise “Bethania Family Choir Day” ku nshuro ya kabiri. Insanganyamatsiko yacyo yari ishingiye kuri Zaburi 18:50 igira iti:
“Ni cyo gituma Uwiteka nzagushima mu mahanga, ndirimba ishimwe ry’izina ryawe.”

Icyo gikorwa cyabaye umwanya wo gushimira Imana ku rugendo Bethania Choir yari imazemo imyaka, ndetse no gukomeza umubano n’abakunzi, inshuti n’abafatanyabikorwa bayo.

Nk’uko Umuyobozi wa Bethania Choir, Uwilingiyimana Eric, abitangaza, iyi korali yatangiye mu 2006, icyo gihe ari korali y’urubyiruko yari igizwe n’abana 33.

Nyuma y’amezi atandatu, yahinduye izina yitwa Bethania, izina rifite umwihariko mu Byanditswe Byera kuko Bethania ari ahantu Yesu yakundaga gusura, hakaba ari na ho Lazaro, Marita na Mariya bari batuye.

Mu myaka yakurikiyeho, korali yagiye iyoborwa n’abantu batandukanye barimo Bizimana Jean Bosco, Kaburame Jean de la Paix, Mahirwe Vainqueur, Rusangiza Richard na Kanyana Coline, mbere y’uko Uwilingiyimana Eric ayobora kugeza ubu.

Kugeza ubu, Bethania Choir igizwe n’abaririmbyi 131, barimo abasore 28, abakobwa 40, abagabo 16 n’abagore 47.

Indirimbo n’ingendo by’ivugabutumwa

Mu myaka imaze ikora, Bethania Choir yakoze indirimbo zirenga 20 z’amajwi (audio) ndetse n’izindi 7 zifite amashusho (video). Ibi bikorwa byose byatwaye amafaranga asaga miliyoni 4.5 Frw.

Korali kandi imaze gukora ingendo hafi 40 z’ivugabutumwa, haba mu Rurembo rwa Rubavu no mu tundi turere tw’u Rwanda. Muri izo ngendo harimo izakorewe i Nyagatare, Nyamirama, Kabarondo, Rusizi ndetse no mu Ntara y’Amajyepfo, i Kiyumba.

Mu gukora no gutunganya ibihangano byayo, Bethania yagiye ishyigikirwa n’abaririmbyi bayo bafite impano mu kwandika indirimbo, barimo Ntamukunzi Cecile, Irankunda Gentil, Mukunzi Olivier, Niyigena Aline, Mahirwe Vainqueur, Mbabazi Keshen na Iradukunda Josué.

Ubuyobozi bwa korali buvuga ko budashyira imbere indirimbo imwe ngo ibe nziza kurusha izindi, kuko buri gihangano gifite ubutumwa bwacyo kandi kikagaragaza impano Imana yahaye uwagihimbye.

Ifite intego zo guteza imbere abaririmbyi n’umuryango

Mu cyerekezo cy’imyaka itatu, 2025–2027, Bethania Choir yateganyije ibikorwa bitandukanye bigamije guteza imbere abaririmbyi n’umuryango mugari.

Muri gahunda zayo harimo gufasha urubyiruko n’abagore kwiga imyuga irimo ubudozi, gusudira no kubaka, kongera ubumenyi mu gucuranga ndetse no gutegura igitaramo kizafasha korali gukora live recording y’indirimbo zayo.

Korali kandi irateganya kubaka urubuga rwa internet no kugura ibikoresho bigezweho bya muzika. Kugeza ubu, hamaze gukusanywa amafaranga agera kuri miliyoni 3.5 Frw mu rwego rwo gufasha korali kwiyubaka, ariko hakenewe andi asaga miliyoni 15 Frw kugira ngo gahunda zose zateganyijwe zigerweho.

Bethania Choir imaze kugira izina mu muziki wa Gospel, cyane cyane mu Karere ka Rubavu no mu tundi duce tw’u Rwanda. Bimwe mu bihangano byayo byagiye bikundwa n’abakunzi b’umuziki wo kuramya no guhimbaza Imana.

Muri byo harimo “Mwana Wanjye”, “Komeza Urugendo”, “Imigambi”, “Imana ni Umubyeyi Mwiza” na “Dufite Umwungeri Mwiza”, ndetse n’izindi ndirimbo zitandukanye.

Abagize Bethania Choir bashimira Imana ku rugendo rw’imyaka bamaze bakora umurimo w’ivugabutumwa, ndetse bagashimira inshuti n’abafatanyabikorwa bakomeje kubaba hafi.

Bavuga ko bazakomeza gukoresha impano bafite mu kuramya Imana no kugeza ubutumwa ku bantu binyuze mu ndirimbo, ndetse no mu bikorwa by’urukundo.

Muri “Bethania Day”, bararikiye abantu bose bazitabira kugira ngo bafatanye mu bihe byo kuramya, gusenga, kwigishwa Ijambo ry’Imana no gusangira ibyishimo by’ubusabane bwa gikristo.

Bethania Choir igiye gukora ku nshuro ya 3 igiterane yise "Bethania Day"