Ebenezer, korali ya gikristo yatangiriye mu mwaka wa 2008 i Bujumbura mu Burundi, imaze imyaka isaga 18 ikora umurimo w’Imana binyuze mu ndirimbo, amasengesho n’ibikorwa by’urukundo.

Iyi korali yatangiranye abaririmbyi 20, ariko kugeza ubu imaze kugira abarenga 150, bakorera mu bice bitandukanye no mu bihugu bitandukanye.

Nubwo batandukanye aho batuye, Ebenezer Choir ivuga ko bakomeje gukorana no kuzuzanya mu murimo w’Imana.

Ku cyicaro cyayo i Bujumbura, Ebenezer Choir ifite abaririmbyi bagera kuri 60. Abandi basigaye batuye mu bindi bihugu, bitewe n’impamvu zirimo kubaka ingo no kujya gushaka ubuzima ahandi.

Ebenezer Choir ibarizwa mu **Itorero CADP, rikorera mu Bwiza, ku ibarabara rya 2, nimero 4, mu Mujyi wa Bujumbura.

Umwihariko wa Ebenezer Choir

Ebenezer Choir ivuga ko umwihariko wayo ushingiye ku bintu bine by’ingenzi: urukundo n’ubumwe, nubwo abaririmbyi baba batandukanye; amasengesho atandukanye agamije kwagura Ubwami bw’Imana; gufasha abatishoboye cyane cyane abarwayi bari mu bitaro, ndetse no gufashanya hagati yabo; n’ivugabutumwa rinyuze mu ndirimbo.

Ni uburyo korali ibona umurimo w’indirimbo nk’ikirenze kuririmba gusa, ahubwo ukaba n’uburyo bwo kwegera abantu, kubakomeza no kubagezaho ubutumwa bw’Ijambo ry’Imana.

Urugendo rwabakoze ku mutima

Muri uru rugendo rw’imyaka isaga 18, kimwe mu bikorwa byakoze cyane ku mitima y’abagize Ebenezer Choir ni igihe bagiye gusura no gufasha abarwayi bari mu bitaro.

Bavuga ko kubona abarwayi bishimira urukundo n’ubufasha babagejejeho byabakoze ku mutima, bikabibutsa ko buri wese ashobora kugira uruhare mu gufasha mugenzi we.

Ni urugendo bavuga ko rwabongereye imbaraga zo gukomeza gukora ibikorwa by’urukundo no gufasha abandi, buri wese akagira icyo atanga.

“Abudu Sujudu”, indirimbo ihamagarira abantu kwizera no kuramya Yesu

“Abudu Sujudu”ni indirimbo ya Ebenezer Choir ikubiyemo ubutumwa bwo kwizera Umwami Yesu, kwemera ko afite imbaraga n’ubutware bwo gutsinda Satani, ndetse no guhamagarira abantu kuramya Yesu bicishije bugufi.

Ebenezer Choir ivuga ko icyifuzo cyayo ari uko iyi ndirimbo yafasha abantu benshi kumenya no kwizera Yesu Kristo, bakamenya ko ari we ushobora guhindura amateka y’ubuzima bwabo kandi ko akwiriye icyubahiro.

Ku bizera Yesu, korali yifuza ko ubutumwa bw’indirimbo bwabafasha gukomera mu gakiza no gukomeza kwizera Imana.

Kubera ko Ebenezer Choir imaze gukura ikagera mu bihugu bitandukanye, ifite ubuyobozi bukorera ku rwego mpuzamahanga. Coordinateur Ndaterwa Bienfait, utuye mu Karere ka Rusizi mu Rwanda, ni we muyobozi uhuza ibikorwa bya Ebenezer Choir ku rwego rwagutse.

Mu mwambaro mwiza w’abana b’Imana.

Ku cyicaro i Bujumbura, ibikorwa bya buri munsi biyoborwa na MUTAWARA Psaume, ushinzwe kuyobora ibikorwa bya korali aho ikorera.

Ebenezer Choir ikomeje urugendo rwayo rwo kuririmba, gusenga no gukorera abandi, ishingiye ku rukundo n’ubumwe, mu gihe ubutumwa bwayo bukomeza kugera ku bantu bari mu bice bitandukanye.

RYOHEREA N’INDIRIMBO YABO NSHYA