Kuri benshi, kujya mu bwiherero udafite telefoni bisa n’aho hari ikibura. Umuntu arinjira afite smartphone, agafungura WhatsApp, akareba ubutumwa, amashusho cyangwa imbuga nkoranyambaga, ubwiherero bukaba nk’ahandi ho kwicara ukamara umwanya ukoresha telefoni.
Ariko abahanga mu by’isuku n’indwara ziterwa na mikorobe baraburira abakoresha telephoni mu bwiherero ko bashobora kwikururira akaga gakomeye.
Impamvu ni uko telefoni ishobora kuba ahantu mikorobe zitandukanye ziteranira, kandi kuyijyana ahantu hakunze kurangwa n’ isuku nke nk’ubwiherero bishobora kongera amahirwe yo kuyanduza.
Iyo umusarani umanutseho amazi
Abashakashatsi bagaragaje ko iyo umusarani umanutseho amazi, ushobora kohereza mu kirere utuvungukira duto cyane tutabonwa n’amaso, ibyo bita “toilet plume.”
Utwo tuvungukira dushobora gutwaramo mikorobe kandi tukamara igihe runaka mu kirere cyangwa tugatura ku bintu biri hafi.
Ubushakashatsi bwatangajwe muri Applied and Environmental Microbiology na Johnson n’abandi (2013) bwasuzumye uko utwo tuvungukira dukwirakwira mu kirere nyuma yo kumanura amazi mu musarani.
Ibi bivuze ko iyo telefoni iri hafi, hari uburyo ishobora guhura n’utwo duce, cyane cyane iyo umuntu ayishyize ahantu hafi y’umusarani. Telefoni ishobora gutwara mikorobe ikazijyana ahandi.
Ikibazo ntikirangirira mu bwiherero.
Umuntu ashobora gukoraho telefoni ari muri toilette, akarangiza agafata telefoni akayisubiza mu mufuka. Nyuma yaho akayikoraho ari ku meza, mu modoka, mu buriri cyangwa igihe ari kurya.
Ubushakashatsi bwagiye bukorwa kuri telefoni zigendanwa bwagaragaje ko ku buso bwazo hashobora kuboneka mikorobe zitandukanye, zirimo E. coli na Staphylococcus.
Ni yo mpamvu telefoni ishobora kuba nk’umuhuza w’umwanda: mikorobe zishobora kuyigeraho ahantu hamwe, umuntu akazijyana ahandi atabizi.
Ikibazo si WhatsApp, ikibazo ni aho uyikoresha. Abahanga ntibavuga ko umuntu wese ujya muri toilette na telefoni ahita arwara. Ahubwo baravuga ko kuyijyana muri toilette ari ukongera ahantu telefoni ishobora guhura na mikorobe.
Kandi kubera ko telefoni ari igikoresho dukoraho kenshi, nyuma tukayegereza mu maso, ku munwa cyangwa ku biribwa, isuku yayo ntikwiye gufatwa nk’ikintu kidafite akamaro.
Ubushakashatsi bwatangajwe muri Scientific Reports mu 2021 na bwo bwagaragaje impungenge ku ikoreshwa rya telefoni muri bathroom n’uko zishobora kugira uruhare mu gukwirakwiza mikorobe.
Wakora iki?
Inama yoroshye ni gusiga telefoni hanze y’ubwiherero igihe bishoboka.
Niba warangije gukoresha ubwiherero, karaba intoki neza mbere yo gukomeza gukoraho ibindi bintu. Na telefoni uyisukure hakurikijwe amabwiriza yatanzwe n’uruganda rwayo.
Kuko ushobora gukaraba intoki neza, ariko telefoni wari ufashe muri toilette igasigarana microbe kuko yo utayogeje
Muri make, mbere yo kwinjirana telefoni muri toilette ngo usubize ubutumwa bwa WhatsApp, banza wibaze niba ubwo butumwa utabutambutsa nyuma yo kuva mu bwiherero.
Mu nsengero bihagaze gute?
Akenshi usanga hari abantu bajya mu nsengero bajya mu bwiherero bakitwaza telefoni zabo bitewe n’impamvu z’umutekano wazo.
Gusa hari n’abazitwaza kugirango bakomeze gukurikirana amateraniro mu buryo bwa live.
Ibi nabyo ni ibyo gutekerezwaho: Ushobora kuyisigira umuntu wizeye neza kuruta kuyinjirana mu kaga gakomeye.
References: Johnson et al. (2013), Applied and Environmental Microbiology; American Journal of Infection Control (2020); Scientific Reports (2021).
