Love Family Choir, ikorera umurimo w’Imana muri ADEPR Nduba, Paruwasi ya Gasabo mu Mujyi wa Kigali, yamaze gushyira hanze indirimbo nshya yise “Turirimbe”, indirimbo ibimburira umuzingo wayo mushya w’indirimbo umunani witwa “AMATEKA YA YESU”.
“Turirimbe” ni indirimbo irimo ubutumwa bwo guhimbaza Imana, kuyishimira imirimo yayo no guhamya ineza yayo mu buzima bw’abayizera.
Muri iyi ndirimbo, Love Family Choir iraririmba iti: “Ku bw’imirimo yawe udukorera, turi ubuhamya bugenda". Ikubiyemo ubutumwa mvamutima wo gushimira Imana no kuyishimagiza ibyo yakoreye abayizera.
Iyi ndirimbo isohotse mu buryo bwa Live recording , ikaba ariyo yabimburiye urugendo rwo gusohora umuzingo “AMATEKA YA YESU”, ugizwe n’indirimbo umunani ugamije gukomeza kwamamaza Yesu Kristo n’ubutumwa bw’agakiza.
“Nimuze turirimbire Uwiteka…”
Love Family Choir yaherekeje ubu butumwa n’amagambo yo muri Zaburi 95:1agira ati “Nimuze turirimbire Uwiteka, tuvugirize impundu igitare cy’agakiza kacu.”
Kuri bo, “Turirimbe” si indirimbo yo kwishimisha gusa, ahubwo ni ubutumwa bwo gutera abantu akanyabugabo mu guhimbaza Imana no kuba abahamya b’imirimo yayo.
Korali yizeye ko indirimbo zigize “AMATEKA YA YESU” zizagera ku bantu benshi, zigahumuriza imitima, zigakomeza abizera kandi zikaba inzira yo kugeza ubutumwa bwa Yesu Kristo ku bataramumenya.
“Turirimbe” yamaze kugera ku mbuga z’itumanaho, aho abakunzi b’umuziki wa Gospel bashobora kuyumva no kuyisangiza abandi, cyane cyane kuri YouTube Channel ya Love Family Choir Abanyamugisha, ndetse no ku mbuga nkoranyambaga zitandukanye.
Love Family Choir, urugendo rwatangiye mu 2014
Amateka ya Love Family Choir ashingiye ku muryango w’abakristo watangiye ku itariki ya 1 Gicurasi 2014 ivukira ku mudugudu wa ADEPR Gasanze.
Wari watangijwe hagamijwe guhuza abakristo batabashaga kuboneka muri gahunda z’itorero zabaga ziteganyijwe mu minsi y’akazi, kugira ngo babone umwanya wo gukoresha impano zabo n’imihamagaro yabo mu murimo w’Imana.
Muri abo bakristo harimo abanyeshuri, abakozi ba Leta ndetse n’abikorera ku giti cyabo. Nyuma yo kungurana ibitekerezo, biyemeje kwitwa *“Love Family”, bisobanuye “Umuryango w’urukundo.”
Nyuma byaje kugaragara ko benshi muri bo bafite impano n’umuhamagaro wo kuririmba, bituma basaba ubuyobozi bw’Umudugudu wa Gasanze kujya babemerera kuririmba rimwe na rimwe mu materaniro yo ku Cyumweru.
Guhera mu 2016, Love Family Group yahindutse korali iririmba ku buryo buhoraho mu materaniro yo ku Cyumweru, hakurikijwe ingengabihe y’ama korali.
Kuva icyo gihe, Love Family Choir yakomeje gukora ibitaramo bitandukanye by’indirimbo, haba kuri ADEPR Gasanze ndetse no hanze yayo.
Kuva ku banyamuryango 15 kugeza ku baririmbyi 58
Love Family yatangiranye abanyamuryango 15. Mu myaka yakurikiyeho, 11 muri bo baje kuva muri uwo muryango, bamwe kubera kwimuka bitewe n’akazi, abandi kubera izindi mpamvu.
Muri 15 batangiranye, bane baracyakomeza kugira uruhare muri gahunda za korali. Uyu munsi, Love Family Choir imaze kwaguka dore ko igizwe n’abaririmbyi 58, ikaba ikomeje kwagura umurimo wayo wo kuramya no guhimbaza Imana.
Love Family Choir iyoborwa na Bwana Elijah Twagirimana
Mu gihe “AMATEKA YA YESU” ikomeje gusangizwa abakunzi b’umuziki wa Gospel indirimbo ku yindi, Turirimbe” yamaze gufungura uru rugendo, ihamagarira abantu kuzamura amajwi yabo bagahimbaza Imana kandi bagahamya ineza yayo.
