Iki giterane cyateguwe na Noble Family Church ku bufatanye na Women Foundation Ministries, cyari cyihariye kuko cyabaye mu gihe Women Foundation Ministries yizihizaga imyaka 20 imaze ikora umurimo wo kuremamo imbaraga abagore, imiryango n’abaturage.

Nyuma yo kureba inkuru n’ibyatangajwe n’ibitangazamakuru bitandukanye ndetse n’abategura iki giterane, hari ubutumwa n’ibikorwa byagarukwagaho kenshi. Mu mboni za Paradise.rw, dore 10 by’ingenzi byaranze All Women Together 2026 [AWT2026]:

1. Kuva mu gutsikamirwa tujya mu butsinzi:

Iyi ni yo nsanganyamatsiko yari ku isonga muri AWT 2026: “From Victims to Champions” [Kuva mu Gutsikamirwa Tujya mu Butsinzi]. Ubutumwa bwari uko amateka y’ibikomere, gutsikamirwa cyangwa ibihe bisharira atari yo agomba kugena ejo hazaza h’umuntu.

Abigishije muri iki giterane bashishikarije abantu kudaheranwa n’ibyo banyuzemo, ahubwo bakabibyazamo imbaraga, intego n’ubuhamya bw’intsinzi.

2. Gukira ibikomere byo ku mutima:

Ikindi cyagarutsweho cyane ni ugukira ibikomere byo mu mutima. Icyerekezo cya Women Foundation Ministries cyasobanuwe nk’umurimo wo gufasha abagore bakomeretse mu buryo bw’umwuka, mu marangamutima no mu buzima busanzwe.

Apostle Mignonne Kabera yavuze ku iyerekwa ry’abagore “bacitse amaboko”, risobanura abagore bakeneye kongera kubona imbaraga zo gukora, kuyobora no kugira uruhare mu iterambere
.
3. Kumenya agaciro, umwirondoro n’umuhamagaro w’umugore:

AWT 2026 ntiyari igamije gusa gutuma umugore asenga; yari inagamije kumufasha kumenya uwo ari we, agaciro afite n’intego y’ubuzima bwe.

Umushumba wa Noble Family Church, Apostle Mignonne yavuze ko intego y’ihuriro ari ugufasha abagore kumenya agaciro kabo, kumenya intego y’ubuzima no gukorera hamwe mu kubaka isi nziza. Ibi byahujwe na gahunda nka My Identity Sessions zari mu byateganyijwe muri iki giterane.

4. Kwihangana no kutemera ko ibihe bigena ejo hazaza:

Ubutumwa bwo kwihangana no guhagarara ushikamye na bwo bwagiye bugaruka cyane. Gospel Time yagarutse ku butumwa bwo kuba “worshippers, watchers and warriors” kugira ngo umuntu ave mu mwanya w’uwatsinzwe ajye mu w’umutsinzi.

Ibi kandi bihuye n’ubutumwa bwagiye butangwa muri AWT mu myaka yashize, bushimangira ko umuntu ashobora kunyura mu bihe bikomeye ariko ntibimwambure umuhamagaro n’intego ye.

5. Umugore nk’umuyobozi n’umukozi w’Imana:

Ikindi cyagarutsweho cyane ni ubuyobozi bw’abagore, cyane cyane mu murimo w’Imana.
Kimwe mu bikorwa bikomeye byasojweho AWT 2026 ni ukwimika abashumba b’abagore 25, mu gihe hanasengewe abandi bakozi b’Imana barenga 300 bagiye gukora mu nzego zitandukanye.

Ubutumwa bwatanzwe ni uko amateka umuntu yanyuzemo atagomba kumubuza kwakira umuhamagaro we no kuwukorana umurava.

6. Umuryango ukomeye utangirira ku mugore ufite imbaraga

Abategura igiterane bagarutse ku ihuriro riri hagati yo kongera ubushobozi umugore no kubaka umuryango.

Iki giterane cyagaragaje ko mu myaka 20 ya Women Foundation Ministries harimo ingero z’imiryango yasubijwe hamwe, abagore bakize ibikomere bakaba abajyanama b’abandi, abakobwa bakuriye mu cyizere, n’imiryango n’abayobozi b’amatorero bagiriwe ubushobozi.

Ubutumwa bwari uko umugore ufite imbaraga afasha kubaka umuryango ukomeye, na wo ugafasha kubaka umuryango mugari ukomeye.

7. Ubushobozi bwo kwihangira imirimo no kwigira:

AWT 2026 yanarenze ku nyigisho z’iyobokamana gusa, igaruka ku guteza imbere ubushobozi bw’umugore mu buzima busanzwe.

Mu byo Women Foundation Ministries ivuga ko yagezeho harimo abagore bashinze imishinga mishya, n’igitekerezo cy’uko umugore agomba kugira ubushobozi bwo gukoresha impano n’ubumenyi afite kugira ngo abe umufatanyabikorwa mu iterambere ry’umuryango n’igihugu.

8. Gukorera Imana no kugira uruhare mu guhindura sosiyete:

Abitabiriye bashishikarijwe kutagira ukwizera kuguma mu rusengero gusa, ahubwo kukakugira imbaraga zihindura sosiyete.

Bishop Funke Felix Adejumo, mu gufungura AWT 2026, yashishikarije abitabiriye gukorera Imana no kugira uruhare mu guhindura sosiyete binyuze mu bikorwa byiza. Apostle Mignonne na we yagarutse ku ruhare rw’Umukristo mu kubaka igihugu.

9. Kwizera Imana no gukunda igihugu:

Ikindi cyagarutsweho cyane ni isano hagati yo gukunda Imana no gukunda igihugu.
Apostle Mignonne Kabera yavuze ko Umukristo akwiriye kuba umuturage mwiza ugira uruhare mu kubaka igihugu no kuzana impinduka nziza mu muryango no mu gihugu.

Yashimiye kandi amahoro n’umutekano bituma u Rwanda rushobora kwakira ibikorwa mpuzamahanga nk’ibi.

10. Kwizera kugomba kuvamo ibikorwa bifatika:

AWT2026 ntiyarangiriye ku magambo, amasengesho n’inyigisho. Kimwe mu bikorwa byagarutsweho cyane ni inkunga ya miliyoni 20 Frw Noble Family Church na Women Foundation Ministries batanze yo gusana amazu arindwi y’abarokotse Jenoside yakorewe Abatutsi bafite ibibazo by’amacumbi mu Karere ka Gasabo.

Apostle Mignonne yavuze ko iyi nkunga yari ijyanye n’imyaka 20 ya Women Foundation Ministries binyuze muri gahunda yayo ya "Wirira". Ibi byagaragaje ko ubutumwa bwo gufasha no guhindura ubuzima bw’abantu bwagombaga kujyana n’ibikorwa bifatika.

Ibi bigaragara ko All Women Together 2026 itari igiterane cy’amasengesho gusa. Yari urubuga rwahuje ubutumwa bw’iyobokamana, gukira ibikomere, kumenya agaciro k’umugore, ubuyobozi, imiryango, kwihangira imirimo, umuhamagaro ndetse n’uruhare rw’Abakristo mu kubaka igihugu.

Mu magambo make, ubutumwa bw’ingenzi bwari ubu "umuntu ntakwiye guheranwa n’amateka ye; ashobora gukira ibikomere, kumenya agaciro ke, kwakira umuhamagaro we, kugira icyo ahindura no kuva mu mwanya w’uwatsinzwe akajya mu w’umutsinzi. Ibyo ni byo byumvikanaga cyane mu nsanganyamatsiko “From Victims to Champions.”

Apostle Mignonne Kabera uyobora Noble Family Church na Women Foundation Ministries