Ku wa 14 Nzeri 2026, Vestine yasabye Urukiko gatanya ya burundu, nyuma y’umwaka n’amezi ane yari amaze asezeranye n’umugabo we.

Iyi nkuru yakurikiwe n’ibiganiro bitandukanye ku mbuga nkoranyambaga, aho bamwe bibajije uko bishoboka ko umuhanzi w’indirimbo zo kuramya no guhimbaza Imana, abantu benshi bafatiraho urugero mu myitwarire ya Gikristo, na we yagera aho urugo rumunanira.

Nyuma y’uko aya makuru akwirakwiriye, Usanase Sharon, uzwi ku izina rya Jacky, yagiye ku rubuga rwe rwa Instagram asangiza abamukurikira ubutumwa bwagarukaga ku bantu bakunda kumucira imanza ngo urugo rwaramunaniye.

Mu butumwa bwe yagize ati: “Ese mutinyuka mute kuncira urubanza, abo mwizeye na bo ingo ziri kubananira?” Ubu butumwa bwagaragaje ko na we yabonye inkuru ya Vestine nk’ikintu gishobora gutuma abantu bongera kwibaza ku bantu bakunze kwishimira cyangwa gufatiraho urugero.

Icyo kibazo Jacky yabajije gifite uburemere mu myumvire ya Gikristo, kuko abantu benshi bakunze kwibwira ko umuntu uri mu itorero, uririmba indirimbo zo kuramya Imana cyangwa ufatwa nk’umuntu w’icyitegererezo mu myitwarire, aba agomba kuba atandukanye n’abandi mu bibazo by’ubuzima.

Iyo umwe muri bo agize ikibazo mu rugo, bamwe bumva ko ibyo yizeraga byose byasenyutse, ko ukwizera kwe kwari ukw’inyuma gusa, cyangwa ko atari akwiriye kwigisha abandi kubaka ingo.

Nyamara, ukuri ni uko kuba umuntu ari Umukristo bitamukuraho kuba umuntu ushobora guhura n’ibibazo by’umuryango, kutumvikana n’uwo bashakanye, kubabara cyangwa gufata ibyemezo bigoye. Ubukristo ntibusezeranya ko buri rugo rw’abizera ruzahora rutunganye.

Iyo umuntu wafatirwagaho urugero ananiwe

Hari ikibazo gikomeye gikunze kugaragara mu muryango wa Gikristo: abantu bashobora kwihangana mu ngo zabo igihe kirekire, bagakomeza kubana n’abo bashakanye nubwo haba hari ibibazo, maze bakabona ko kuba barakomeje kubana ari ikimenyetso cy’uko nta kosa bashobora kugira.

Iyo umuntu wafatirwagaho urugero na we agize ikibazo mu rugo, abo bantu bamwe bahita bumva ko noneho bafite uburenganzira bwo kwishimira ko nta ko batagize, bakavuga ko na we yananiwe, bityo ko nta wundi ukwiriye kubabwira uko bakwiye kubaho.

Ariko kuba umuntu yarakomeje kubana n’uwo bashakanye ntabwo bihita bivuga ko urugo rwe rutagira ibibazo, cyangwa ko nta makosa yakozwe. Kandi kuba undi yarageze ku cyemezo cyo gutandukana na we ntibihita bivuga ko abandi bose bagomba gukurikiza uwo murongo.

Bibiliya igaragaza ko abantu bafite intege nke kandi ko buri wese agomba kwirinda kwishyira hejuru y’abandi. Mu Baroma 14:10-13, intumwa Pawulo yibutsa Abakristo kutajya gucira imanza abavandimwe babo, ahubwo bakibanda ku kudashyira igisitaza imbere y’abandi.

Ibi ntibisobanura ko Umukristo atagomba kugira icyo avuga ku kibi cyangwa ku myitwarire itajyanye n’Ibyanditswe, ahubwo bisobanura ko gukosora umuntu bitagomba kuvamo kwishyira hejuru, kumuseka cyangwa kumwambura agaciro.

Umuntu ashobora kuba yarabaye inyangamugayo mu rugo rwe, ariko ibyo ntibimuha ububasha bwo gufata umwanzuro ku rugo rw’undi atazi ibyarubayemo.

Ese kuba Vestine araririmba Gospel byagatumye atagira ikibazo mu rugo?

Vestine na Dorcas ni bamwe mu bahanzi b’indirimbo zo kuramya no guhimbaza Imana bazwi cyane mu Rwanda. Kuba Vestine ari umuririmbyi wa Gospel kandi akagira abakunzi benshi b’inyigisho zishingiye ku kwizera, bishobora gutuma abantu benshi bamufata nk’umuntu w’icyitegererezo.

Ariko ntibisobanura ko buri kibazo cy’ubuzima bwe bwite kigomba gufatwa nk’ikimenyetso cy’uko ubutumwa bwe bwose bwari uburyarya. Umuhanzi wa Gospel ashobora kugira impano yo kuririmba, akagira ukwizera kwe, ariko agahura n’ibibazo by’ubuzima bwite bitamworohera gukemura.

Mu 1 Abakorinto 10:12, Pawulo avuga ko uwibwira ko ahagaze agomba kwirinda kugira ngo atagwa. Iri somo rireba buri Mukristo, yaba umuhanzi, umupasiteri, umuyobozi w’itorero cyangwa umuyoboke usanzwe.

Nta muntu ufite ubudahangarwa ku bibazo by’ubuzima. Kuba umuntu yarabaye urugero rwiza mu gihe runaka ntibivuga ko atazigera agira intege nke cyangwa ko atazigera afata icyemezo abantu batabyumva.

Iyo amakosa y’abandi ahinduka impamvu yo kwishimira

Hari abantu bashobora kuba baragize amakosa mu ngo zabo, bakaba batarakomeje kubana n’abo bashakanye, ariko bakumva ko kuba undi atandukanye n’uwo bashakanye bibaha uburenganzira bwo kwishimira ko na we atabashije gukomeza.

Ibi bishobora gutuma ikibazo cy’urugo gihinduka amarushanwa yo kureba uwihanganye kurusha undi, aho kuba umwanya wo gutekereza ku buryo bwo kubaka imiryango ifite amahoro.

Iyo umuntu avuga ati “Nta ko ntagize, nanjye mwaciragaho iteka mbonye mugenzi wange mwizeraga twabaye kimwe,” ashobora kuba avuga ukuri ku rugendo rwe, ariko ibyo ntibiba bihagije kugira ngo amenye byose ku rugo rw’undi cyangwa ngo asobanure impamvu undi yafashe icyemezo runaka.

Kwihangana mu rugo ni ikintu gishobora kuba cyiza, ariko ntabwo ari ikimenyetso cyonyine cy’uko umuntu ari Umukristo mwiza.

Hari igihe kwihangana bishobora kuba ari ugukomeza kubana no gukemura ibibazo mu bwubahane, ariko hari n’igihe umuntu ashobora kuba mu rugo rumubabaza cyane, akaba akeneye ubufasha, inama cyangwa gufata icyemezo cyo kwitandukanya n’ibimubangamira.

Ubutumwa bwa Jacky n’isomo ku Bakristo

Ubutumwa Jacky yashyize kuri Instagram bugaragaza ikibazo cyo gucira abandi imanza, ariko ntibukwiye guhinduka urwitwazo rwo kuvuga ko nta muntu ufite uburenganzira bwo kugaya ikibi cyangwa gutanga inama.

Mu myumvire ya Gikristo, hari itandukaniro hagati yo gucira umuntu urubanza mu buryo bwo kumuseka no kumwambura agaciro, no kumufasha kubona ikosa, kumugira inama cyangwa kumwibutsa icyo Ibyanditswe bivuga. Abakristo bashobora kuganira ku bibazo by’ingo, ariko bakabikora batabangamira icyubahiro cy’ababigizemo uruhare.

Umukristo ashobora kugira ibibazo, ariko ibyo ntibimukuraho agaciro ke cyangwa ngo bibe urwitwazo rwo gusenya izindi ngo ku batarazisenya, kuba impamvu yo kumva ko abazisenye bari bafite ishingiro n’ibindi.

Vestine yasabye Gatanya