Abakunzi b’umuziki wa Gospel batuye mu Bubiligi no mu bindi bihugu by’u Burayi biteguye kwakira igitaramo gikomeye cyiswe Brussels Gospel Festival 2027, kizamara iminsi itatu, kikazabera i Brussels kuva ku wa 26 kugeza ku wa 28 Gashyantare 2027.
Iki gikorwa gitegurwa na Team Production, kizabera muri Birmingham Palace i Brussels, kikaba kigamije guhuza Abakristo mu bihe byo kuramya no guhimbaza Imana binyuze mu muziki n’ijambo ry’Imana.
Mu bahanzi n’abavugabutumwa bamaze gutangazwa harimo umuramyi w’Umunyarwanda Israel Mbonyi, ukunzwe cyane mu ndirimbo zo kuramya no guhimbaza Imana, ndetse n’itsinda Ben & Chance, rimaze kubaka izina rikomeye muri Gospel nyarwanda.
Hazitabira kandi Richard Nick Ngendahayo, Bishop Emmanuel Karemera, Adrien Misigaro, Aline Gahongayire, Willy Uwizeye, hamwe n’abashumba Stanley na Julienne Kabanda. Abategura iri serukiramuco batangaje ko hakiri abandi bahanzi n’abavugabutumwa bazatangazwa mu minsi iri imbere.
Insanganyamatsiko y’iri serukiramuco igira iti "Uniting through Worship", bishatse kuvuga "Guhuza abantu binyuze mu kuramya Imana." Abaryitabira bazagira umwanya wo kuramya, guhimbaza, kwakira inyigisho ndetse no gusabana n’abakristo bazaba baturutse mu bihugu bitandukanye.
Amatike yo kwinjira muri iri serukiramuco yamaze gushyirwa ku isoko. Itike y’umunsi umwe igura Amayero 50, iy’iminsi itatu igura Amayero 100, naho VIP Pass y’iminsi itatu igura Amayero 150.
Abategura iki gitaramo batangaje ko amatike amwe y’ibyiciro bya mbere yamaze gushira, basaba abazitabira kwihutira kugura ayasigaye mbere y’uko na yo ashira.
Brussels Gospel Festival 2027 itegerejwe nk’imwe mu maserukiramuco akomeye ya Gospel azabera ku mugabane w’u Burayi, ahazahuza abaramyi, abahanzi n’abakristo bo mu bihugu bitandukanye mu rwego rwo kwamamaza ubutumwa bwiza no guha Imana icyubahiro.
