Mu itangazo ryashyizwe hanze, True Promises Music ku bufatanye na RADZ Media Agency Uganda yavuze ko ibitaramo byari biteganyijwe ku wa 11 Nzeri 2026 i Kampala ndetse no ku wa 13 Nzeri 2026 i Mbarara bitakibaye ku matariki yari yarateganyijwe.

Abategura ibi bitaramo bavuze ko isubikwa ryabaye nyuma y’“ibibazo bitari byitezwe byavutse mu gihe cyo gutegura ibirori”, bituma hafatwa umwanzuro wo kwimurira ibitaramo ku yandi matariki.

True Promises Music yasabye imbabazi ku bantu bose bashobora kubangamirwa n’iri hinduka, inashimira abafana, abaterankunga n’abandi bose bakomeje kubashyigikira.

Abategura bavuze ko amakipe yabo ari gukorana kugira ngo arangize imyiteguro ikenewe, maze amatariki mashya y’ibitaramo atangazwe vuba akimara kwemezwa.

Mu butumwa bwashyizwe kuri Instagram, True Promises Music yagize iti: “True Worship Live Concerts-Uganda cyimuriwe amatariki. Tuzayabatangariza vuba.”

Basabye abantu gukomeza gukurikira itangazo ryemewe rya True Promises Music kugira ngo babone amakuru yizewe ku matariki mashya.

Igitaramo cya True Worship Live Concerts muri Uganda cyimuriwe amatariki, ariko ntaratangazwa