× Home Ministries Choirs Pastors Bible Entertainment Development Health Love Fashion Music

Grammy Awards 2027: Gutora abazahatana byatangiye

Category: Entertainment  »  3 weeks ago »  Jean D’Amour Habiyakare (Amourkare)

Grammy Awards 2027: Gutora abazahatana byatangiye

Grammy Awards 2027: Gutora abazahatana byatangiye, kandi abakora umuziki wa Gospel na bo barebwa n’iri rushanwa.

Urugendo rugana ku bihembo bya Grammy Awards 2027 rwatangiye icyiciro cya mbere cyo gutora abazahatanira ibi bihembo, cyafunguwe ku wa 12 Ukwakira 2026 kikazageza ku wa 22 Ukwakira.

Abazatoranywa bazatangazwa ku wa 16 Ugushyingo 2026, mu gihe umuhango wo gutanga ibihembo uteganyijwe ku wa 7 Gashyantare 2027 i Los Angeles muri Leta Zunze Ubumwe za Amerika.

Mu bahatanira ibi bihembo, abakora umuziki wa Gospel na bo baba bafite ibyiciro byihariye bahataniramo.

Ibi byiciro birimo Best Gospel Performance/Song, gihabwa indirimbo cyangwa imiririmbire myiza ya Gospel, Best Contemporary Christian Music Performance/Song, gihabwa indirimbo za Gikristo zo mu njyana zigezweho, Best Gospel Album, ndetse na Best Contemporary Christian Music Album.

Ibyiciro bya Gospel muri Grammy byagiye bigaragaramo amazina akomeye arimo CeCe Winans, Kirk Franklin, Tasha Cobbs Leonard, Maverick City Music, Israel Houghton n’abandi.

Mu bihembo bya 2026, CeCe Winans afatanyije na Shirley Caesar begukanye igihembo cya Best Gospel Performance/Song binyuze mu ndirimbo “Come Jesus Come”, mu gihe Israel & New Breed begukanye Best Contemporary Christian Music Album binyuze kuri Coritos Vol. 1.

Ibi bihembo ntibishingira gusa ku kuba indirimbo ikunzwe n’abayumva, kuko amajwi atangwa n’abanyamuryango ba Recording Academy bujuje ibisabwa byo gutora.

Mu cyiciro cya mbere, batoranya ibihangano byujuje ibisabwa kugira ngo hamenyekane abazahatanira ibihembo; nyuma yaho hagakurikiraho ikindi cyiciro cyo gutora abazegukana ibihembo.

Ku nshuro ya 69 ya Grammy Awards, indirimbo n’ama-alubumu byasohotse hagati ya tariki ya 31 Kanama 2025 na tariki ya 28 Kanama 2026 ni byo byashoboraga kwemererwa guhatanira ibihembo, ariko byasabwaga no kuba byaratanzwe mu gihe cyagenwe kandi bikuzuza andi mabwiriza ya Recording Academy.

Kugeza ubu, ntiharamenyekana ku mugaragaro abahanzi ba Gospel bazaba bari ku rutonde rw’abahatanira Grammy Awards 2027. Amazina azamenyekana nyuma yo kurangira kw’itora rya mbere no gutangazwa kw’abatoranyijwe ku wa 16 Ugushyingo 2026.

Tanga igitekerezo kuri iyi nkuru

pre-moderation

This forum is pre-moderated: your contribution will only appear after being validated by an admin.

Who are you?
Your post

To create paragraphs, just leave blank lines.