× Home Ministries Choirs Pastors Bible Entertainment Development Health Love Fashion Music

Gira Imana inshuti: Amagambo yahindura ubuzima bwa buri wese yavuzwe na Ufitimana Alicia

Category: Words of Wisdom  »  1 week ago »  Jean D’Amour Habiyakare (Amourkare)

Gira Imana inshuti: Amagambo yahindura ubuzima bwa buri wese yavuzwe na Ufitimana Alicia

Alicia Ufitimana uririmba mu itsinda rya Alicia and Germaine, akunze gukoresha amagambo yahindura ubuzima bwa benshi mu kwizera Imana, gufasha abandi no kwakira ibihe bishya.

Umuririmbyi w’indirimbo zo kuramya no guhimbaza Imana, Alicia Ufitimana, akomeje gutanga ubutumwa bushishikariza abantu kwizera Imana, kudaheranwa n’ibyahise, gufasha abandi no kwakira ibihe bishya.

Mu magambo yagiye avuga mu biganiro yagiranye n’itangazamakuru no mu ndirimbo ze, harimo inyigisho zishobora gufasha benshi guhindura uko babona ubuzima n’ibibazo bahura na byo.

Ku wa 24 Ukwakira 2026, ubwo hizihizwaga isabukuru ye y’amavuko, Alicia yasangije Paradise ubutumwa bugaragaza uko abona urugendo rw’ubuzima, ibyo yigiye mu bihe bitandukanye n’icyo yiyifuriza mu mwaka mushya atangiye.

Yagize ati: “Ubutumwa mfite kuri njye ubwanjye ni ugukomeza kwizera Imana, kutigaya ku byahise, no gutinyuka kwakira ibihe bishya.”

Aya magambo agaragaza ko ibyahise bidakwiye guhinduka urukuta rubuza umuntu gutera imbere. Nubwo umuntu ashobora kugira ibyo yicuza cyangwa ibihe byamugoye, hari igihe biba ngombwa kubyigiramo amasomo, akareka kwishinja ibitarahinduka, agaha umwanya amahirwe mashya.

“Gira Imana inshuti”

Mu magambo ye yagiye asangiza abantu mu biganiro bitandukanye, Alicia yibukije abantu akamaro ko kugirana ubucuti n’Imana buri munsi, aho kuyegera ari uko bahuye n’ibibazo gusa.

Yagize ati: “Gira Imana inshuti, kuko nibiba ntuzajya kuyiganiriza ari uko wahangayitse. Ahubwo uzajya ujya guhangayika ibizi, kuko uzajya uba wayigize inshuti uganiriza buri gihe.”

Iyo umuntu asanzwe asenga, agatekereza ku byo yemera kandi akagirana n’Imana umubano uhoraho, ntayegera ari uko ibintu byamunaniye gusa. Ahubwo aba afite aho ahera ashakira ihumure n’imbaraga zo gukomeza urugendo.

“Imana ihindura ibihe”

Mu kiganiro yagiranye na Rubavu Today, cyashyizwe kuri YouTube ku wa 2 Nzeri 2025, Alicia yavuze amagambo agaragaza uko abona ubushobozi bw’Imana bwo guhindura ibihe umuntu arimo.

Yagize ati: “Imana ihindura ibihe. Umuntu ukugambiriraho ikibi, akabona nta ho uzagera, kiba ari igitekerezo cye. Icyo Imana iba iri kudutegurira kiba kirenze.”

Aya magambo yibutsa umuntu ko ibitekerezo abandi bamufiteho bitagomba guhinduka igipimo cy’agaciro ke cyangwa ngo bimubuze gukomeza gukora ibimufitiye akamaro.

Hari igihe abantu bashobora kutizera ubushobozi bwawe, bakakubwira ko utazagera kure, ariko ibyo batekereza si byo byonyine bigena aho ubuzima bwawe bushobora kukugeza.

Alicia ntiyagarukiye aho, ahubwo yagaragaje ko Imana ishobora guhindura agahinda umuntu yanyuzemo kakavamo impamvu yo guterwa ishema.

Yagize ati: “Imana ijya aho wasebeye, wambariye ubusa, aho waburiye ibiryo ukaburara, ikakugirira neza abo bose babonye useba, bareba noneho. Imana iguhera ishema aho wasebeye.”

Umuntu ashobora kuva mu bihe by’akababaro n’ibimuca intege, akongera agasubirana icyizere n’imbaraga zo gukomeza.

“Amafaranga wita make ashobora gukora ibitangaza iyo uyakoresheje ufasha”

Alicia kandi yagiye avuga amagambo agaruka ku kamaro ko gufasha abandi, agaragaza ko umuntu adakwiriye gutegereza kugira byinshi kugira ngo agire icyo amarira abandi.

Yagize ati: “Haba hari amaboko menshi yagufashije mu buzima bwawe utabasha kumenya, biba byiza nawe ufashije rero udategereje inyungu.”

Yakomeje agira ati: “Amafaranga wita make ashobora gukora ibitangaza iyo uyakoresheje ufasha.”

Aya magambo yibutsa abantu ko kugira neza bitagomba gushingira ku nyungu bazabona cyangwa ku kuba bafite ubushobozi bwinshi. Hari igihe igikorwa umuntu abona ko ari gito kiba gifite agaciro gakomeye ku muntu uri mu kibazo.

Yaranavuze ati: “Gufasha umuntu akakubwira ngo Imana iguhe umugisha, icyo kiba gihagije.”

Ubu butumwa bushishikariza abantu gukora ibyiza babikuye ku mutima, aho kubikora bashaka gushimwa, guhabwa amafaranga cyangwa kubona ikindi gihembo. Rimwe na rimwe, kumenya ko wafashije umuntu bikamugirira akamaro ni byo bishobora kuba igihembo gikomeye.

“Nta kintu kibereye ubusa muri Bibiliya”

Mu kiganiro yagiranye na The Zoom TV mu 2024, Alicia yagarutse ku buryo abona ubufatanye hagati y’abahanzi baririmba indirimbo zo kuramya no guhimbaza Imana.

Yagize ati: “Nta mpamvu yo guhangana turi abahanzi mu gihe twese turirimbira Imana.” Yongeyeho ati: “Kuyobora nkaba uwa mbere mu bahanzi simbyumva neza, kuko buri wese aba akaze ku ruhande rwe.”

Aya magambo agaragaza ko Alicia ashyira imbere ubufatanye n’agaciro k’umusanzu wa buri muhanzi, no kugeza ubutumwa bwiza kure, aho kubona ko hari umwe ugomba kurusha abandi bose kugira ngo umurimo ukorwe neza.

Umuntu ashobora kugira impano, ubushobozi n’inshingano bye, kandi ibyo ntibikureho agaciro k’undi.

“Kugira umubyeyi mwiza bintera imbaraga mu byo nkora”

Alicia yanagarutse ku ruhare rw’ababyeyi mu buzima bw’abana, agaragaza ko urukundo n’ubucuti hagati y’umubyeyi n’umwana bishobora gutanga imbaraga zo gukomeza gukora neza.

Yagize ati: “Kugira umubyeyi mwiza bintera imbaraga mu byo nkora. Ababyeyi iyo babaye inshuti bituma ibyo ukora ubikorera kutabatenguha.”

Aya magambo agaragaza ko umubano mwiza hagati y’ababyeyi n’abana ushobora kugira uruhare mu gutuma umwana yumva ashyigikiwe kandi agashishikarira gukora ibimuteza imbere.

Iyo umubyeyi abaye umuntu umwana ashobora kuganiriza, akamugira inama kandi akamwereka urukundo, bishobora gutuma uwo mwana arushaho kugira icyizere mu rugendo rwe.

Amagambo ya Alicia ari mu ndirimbo ze

Uretse amagambo avuga mu biganiro, Alicia agaragaza n’ubutumwa bwe binyuze mu ndirimbo yakoranye na Germaine.

Nubwo izi ndirimbo baziririmbanye, hari aho Alicia aririmba ari wenyine, na Germaine akaririmba ukwe, kandi birumvikana, uwaririmbye amagambo ni we yakwitirirwa.

Mu ndirimbo “Ibanga”, aririmba agira ati: “Kwimura Uwiteka ngo nkorere izindi Mana biragatsindwa.”

Uyu murongo ugaragaza icyemezo cyo gukomeza kubera Imana indahemuka no kudateshuka ku byo umuntu yemera.

Ushobora kwibutsa abantu ko hari amahitamo asaba gushikama, cyane cyane iyo bahuye n’ibigeragezo cyangwa ibibashuka ngo bareke indangagaciro zabo.

Muri iyo ndirimbo kandi, Alicia aririmba agira ati: “Si ngombwa ko bwira cyangwa ko bucya ngo tubone ubwiza bwa Nyiribihe.”

Aya magambo yibutsa ko ibyiza umuntu ashobora kubona bitagomba gutegereza ko ibihe bihinduka cyangwa ko ibintu byose biba byagenze uko yabyifuzaga. Ashobora gukomeza kubona impamvu zo gushimira no kwizera Imana no mu bihe bitaraba byiza uko abyifuza.

Mu ndirimbo “URIYO”, Alicia yararirimbye ati: “Jya utegereza Yesu aseruke aragukunda. Yabambiye amahema kukugota.” Akomeza agira ati: “Wa Nyanja we tuza ntuzantembana.”

Ubu butumwa bugaruka ku kwihangana no gukomeza kwizera mu gihe umuntu ahanganye n’ibimuca intege. Amagambo avuga ku nyanja yumvikanisha ibibazo bisa n’ibirenze ubushobozi bw’umuntu, ariko ubutumwa bukamushishikariza kudaheranwa na byo.

Mu ndirimbo “Rugaba”, Alicia araririmba ati: “Rurema, ntiwita ku mateka y’ibisekuruza.” Yongeraho ati: “Nta wagutoneye ushavura cyangwa ngo atere urwamo rw’amaganya.”

Aya magambo ashobora gufasha umuntu kudahera mu mateka y’umuryango cyangwa mu byo yanyuzemo, ahubwo akibuka ko agifite amahirwe yo gukomeza urugendo rwe. Ubutumwa bwayo bushishikariza abantu kutemera ko ibihe byashize bibabuza kugira icyizere cy’ejo hazaza.

Muri “Urufatiro”, Alicia agira ati: “Naho nanyura mu gikombe cy’igicucu cy’urupfu sinzatinya. Nubwo bingoye, urufatiro ruracyariho.”

Uyu murongo ugaragaza uko ukwizera gushobora gutuma umuntu akomeza guhagarara no mu bihe bikomeye. Nubwo ibibazo bishobora kuba byinshi, umuntu ashobora kuguma ku byo yemera no ku byiringiro bimufasha kudacika intege.

Alicia Ufitimana ni umuririmbyi n’umwanditsi w’indirimbo ukorana na murumuna we Germaine Ufitimana. Akurikirana amasomo y’Ubuvuzi muri Kaminuza y’u Rwanda, ishami rya Huye. Mu ndirimbo zabo zizwi harimo “Rugaba”, “Ibendera”, “URIYO”, “Ibanga”…

Amagambo ye agaruka ku ngingo zitandukanye, ariko ahurira ku butumwa bumwe: kwizera Imana, kudaheranwa n’ibyahise, gufasha abandi utiteze inyungu no kumenya ko buri muntu afite umusanzu ashobora gutanga.

Reba indirimbo yabo Ibanga kuri YouTube, harimo andi magambo yaguhindurira ubuzima

Tanga igitekerezo kuri iyi nkuru

pre-moderation

This forum is pre-moderated: your contribution will only appear after being validated by an admin.

Who are you?
Your post

To create paragraphs, just leave blank lines.