Chorale de Kigali, imwe mu makorali akomeye kandi amaze igihe kinini muri Kiliziya Gatolika mu Rwanda, iritegura igitaramo ngarukamwaka cya “Christmas Carols Concert”, kizaba ku wa 20 Ukuboza 2026 muri Camp Kigali
Iki gitaramo kizaba gifite umwihariko wo kwizihiza imyaka 60 Chorale de Kigali imaze ishinzwe, kuko yatangiye mu 1966. Kuri iyi nshuro, abaririmbyi bayo bazaririmba zimwe mu ndirimbo zakunzwe n’abakunzi bayo mu myaka 13 ishize iyi gahunda ya Christmas Carols itangiye.
Mu ndirimbo zizwi cyane Chorale de Kigali yagiye iririmba harimo “Hakuna Mungu kama wewe,” “Singizwa Nyagasani,” “Niringiye Wowe,” “Tungamira,” “Everything (Amen),” “Muze Mwese Dushimire Imana,” “Mary’s Boy Child” na “Ab’ijuru Baririmba.”
Abakunzi b’iyi Chorale na bo bazagira uruhare mu gutoranya zimwe mu ndirimbo bifuza ko zaririmbwa muri iki gitaramo, kizaba umwanya wo kwizihiza Noheli no kwibuka urugendo rw’imyaka 60 Chorale de Kigali imaze ikora umuziki w’amakorali n’ivugabutumwa.
Chorale de Kigali igiye kwizihiza imyaka 60 y’ivugabutumwa mu gitaramo cya Noheli, 13 yo ikaba ishize hakorwa iki gitaramo
