Abahanzi b’abanyarwandakazi Vestine na Dorcas batangaje ko batakibashije kwitabira igitaramo cya “Vancouver Worship Encounter” bari bategerejwemo muri Canada, bavuga ko habaye ibibazo bitari byitezwe ku ruhande rw’abategura.
Vestine na Dorcas bari kuzaririmba muri iki gitaramo cyo kuramya no guhimbaza Imana cyagombaga kubera mu mujyi wa Vancouver, muri Canada, ku wa 12 Nzeri 2026.
Iki gitaramo cyiswe “Vancouver Worship Encounter”, cyari giteganyijwe kuva saa 11:00 z’umugoroba kugeza saa 5:00 za mu gitondo, kikabera kuri 5588 188 St, Surrey, BC. Itike yo kwinjira yari yashyizwe ku madolari 40.
Abategura bari batumiye Vestine na Dorcas nk’abahanzi b’ingenzi, ndetse na Pastor Jackson Mugisha nk’umushyitsi wihariye uzigisha ijambo ry’Imana.
Batangaje ko batakijyayo
Mu itangazo Vestine na Dorcas bashyize hanze ku wa Gatandatu tariki ya 05 Nzeri, batangaje ko batakibashije kwitabira iki gitaramo, bitewe n’ibibazo bitari byitezwe byaturutse ku ruhande rw’abategura.
Bagize bati: “Ku bw’ibibazo bitari byitezwe byaturutse ku bategura, ntituzashobora kwitabira iki gitaramo.”
Aba bahanzikazi basabye imbabazi abakunzi babo ndetse n’abandi bari biteguye kuzitabira iki gitaramo ku mbogamizi bishobora kubateza.
Bati: “Turababajwe cyane n’ikibazo icyo ari cyo cyose ibi bishobora gutera. Turabakunda kandi dushima cyane ubufasha mudahwema kutugaragariza, kandi ntidutegereje igihe tuzongera kuramya Imana namwe.”
Bari biteguye kuramya Imana i Vancouver
Mbere y’iri tangazo, Vestine na Dorcas bari bamaze gutangaza ubutumwa bushishikariza abazitabira “Vancouver Worship Encounter” kwitegura umwanya wo kuramya no guhimbaza Imana.
Bagize bati: “Vancouver, mutegure imitima yanyu, tuje kuramya. Yesu ahabwe icyubahiro, imitima ihinduke kandi kuhaba kwe kutwuzure.”
Guhagarika kwitabira iki gitaramo bibaye nyuma y’uko abo bahanzikazi bari bamaze guteguza guhura n’abakunzi babo n’abakristo bari biteguye kuzitabira uyu mwanya wo kuramya.
Vestine na Dorcas ni bamwe mu bahanzi b’abanyarwanda bamaze kubaka izina rikomeye mu muziki wa Gospel, aho bafite indirimbo zakunzwe zirimo “Yebo”, “Emmanuel”, “Usisite”, “Ibuye”, “Isaha”, “Nahawe Ijambo” na “Adonai”, ndetse n’indirimbo yabo nshya “Itabaza.”
Iri tangazo rije mu gihe aba bahanzikazi bari gukorera umuziki muri Canada, ndetse bakaba bakunze no gutumirwa mu bitaramo n’ibikorwa byo kuramya Imana bitandukanye. Rije kandi mu gihe bari gukora umuziki bigenga nyuma yo gutandukana na MIE Empire yabareze.
Abahanzikazi Vestine na Dorcas bahagaritse igitaramo bari bategerejwemo i Vancouver
