Apôtre Dr. Paul Gitwaza, Umushumba Mukuru wa Zion Temple Celebration Center akaba n’uwashinze Authentic Word Ministries, ari mu Burundi aho yitabiriye ibikorwa by’ivugabutumwa n’ibijyanye no kwizihiza imyaka 25 ishize Zion Temple Burundi itangiye umurimo.

Urwo ruzinduko rwe rwahuriranye n’igiterane cy’ivugabutumwa kizabera i Bujumbura kuva ku wa 20 kugeza ku wa 23 Kanama 2026, kizibanda ku nsanganyamatsiko igira iti “Haguruka Ugende.”

Iki gikorwa cyateguwe mu rwego rwo gukomeza gukangurira Abakristo kugira ukwizera, kudatinya gutera intambwe no gushyira mu bikorwa umuhamagaro bafite.

Kuri Zion Temple Burundi, kuba Dr. Paul Gitwaza ari muri ibi bikorwa bifite igisobanuro cyihariye, kuko iri torero riri mu muryango w’amatorero yatangijwe na we.

Zion Temple yatangiye umurimo ku wa 11 Nyakanga 1999, ubwo abantu bagera ku 120 batangiraga guteranira hamwe. Mu myaka yakurikiyeho, uwo murimo wakomeje kwaguka, ugera mu bice bitandukanye by’Isi.

Kwizihiza imyaka 25 ya Zion Temple Burundi rero bibaye umwanya wo kwibuka aho umurimo watangiriye, gushimira Imana ku rugendo rwawo ndetse no kureba imbere ku cyo itorero ryifuza kugeraho mu myaka iri imbere.

Igiterane cya “Haguruka Ugende” kizaba kimwe mu bikorwa by’ingenzi bizahuriza hamwe Abakristo mu gihe cyo kwizihiza iyi sabukuru, aho bazagira umwanya wo gusenga, kuramya no kwakira inyigisho z’ivugabutumwa.

Kuba Dr. Paul Gitwaza yifatanyije n’Itorero Zion Temple Burundi muri iki gihe kandi bituma igikorwa cyo kwizihiza imyaka 25 gihabwa umwihariko, cyane ko ari umwe mu bantu bagize uruhare mu itangizwa n’iterambere ry’umuryango wa Zion Temple.

Apôtre Dr. Paul Gitwaza ari mu ruzinduko rw’ivugabutumwa mu Burundi