Iyi ndirimbo yasohotse ku wa 20 Kanama 2026, ku rubuga rwa YouTube rwa Aline Gahongayire Official, aho yagiye hanze iherekejwe n’amashusho yayo.

Aline Gahongayire ayishyira mu rwego rw’indirimbo y’ubuhanuzi igenewe Itorero ry’u Rwanda, ikaba ishingiye cyane ku butumwa buboneka mu gitabo cya Yoweli 2:28 no mu Byakozwe n’Intumwa 2:17, ahavuga ko Imana izasuka Umwuka wayo ku bantu kandi abakiri bato bakagira iyerekwa, abasaza bakarota.

Mu butumwa buherekeza iyi ndirimbo, Aline avuga ko icyo abona ari ubwiza bw’Imana bugaruka mu rusengero, ndetse n’ibishya bitangiye kuvuka. Avuga kandi ko abona urubyiruko ruhaguruka rufite ijwi ry’ubuhanuzi, abakuru bakakira inzozi z’Imana, ndetse n’imitima y’abantu igasubira ku gicaniro.

Ati: “Ndabona ubwiza bw’Imana bugarutse mu rusengero. Ndabona ibishya biri kuvuka. Ndabona urubyiruko ruhaguruka rufite ijwi ry’ubuhanuzi, abakuru bakakira inzozi z’Imana, kandi imitima igasubira ku gicaniro.”

Aline akomeza avuga ko iki ari igihe cyo kugaruka ku Mana, gusubirana umuriro no kubyara ibishya mu Mwuka. Mu butumwa bwe, agaragaza ko n’ibintu byasaga n’aho byumye bishobora kongera kubaho, ibyari byaracecetse bikongera kuvuga, ndetse n’ibyari byarazimiye bikongera kugaruka.

Yagize ati: “Ibyari byumye birongera kubaho. Ibyari byacecetse birongera kuvuga. Ibyari byarazimiye birongera kugaruka.”

“Ndabona” kandi ifite isengesho rishingiye ku cyifuzo cy’uko Imana yakongera gusuka Umwuka wayo no kugarura ubwiza bwayo mu rusengero.

Aline agira ati: “Mwami, suka Umwuka wawe bundi bushya. Ubwiza bwawe bwongere bwuzure urusengero. Havuke ibishya, hahaguruke abahanuzi, kandi igihugu cyumve ijwi ryawe.”

Mu bisobanuro by’iyi ndirimbo yanditse no mu Cyongereza, Aline ayita “a prophetic song for the Church of Rwanda”, ni ukuvuga indirimbo y’ubuhanuzi igenewe Itorero ry’u Rwanda.

Avuga ko “Ndabona” ari ijwi ritangaza ko hatangiye igihe gishya, aho abona ubwiza bw’Imana busubira mu Itorero, urubyiruko rushya rukazamuka mu buhanuzi, inzozi zikongera kubyuka ndetse n’ikintu gishya kikavuka.

Reba indirimbo “Ndabona” ufatanye na we gusengera ibyo yifuza ko byabaho mu gihe kiri imbere