Africa Ignite Connection 2026 igiye kongera guhuza abakristo mu giterane cy’icyumweru cyose cyuzuyemo inyigisho n’ububyutse
Itorero CityLight Foursquare Church ryatangaje ko rigiye kongera gukora igiterane ngarukamwaka Africa Ignite Connection 2026, kizaba kuva ku wa 23 kugeza ku wa 30 Kanama 2026, kikazahuza Abakristo, abayobozi b’amatorero, abaramyi n’imiryango itandukanye mu cyumweru cyose cyahariwe kwigishwa Ijambo ry’Imana no kuvugururwa mu buryo bw’umwuka.
Iki giterane kizaba kiyobowe na Bishop Prof. Fidele Masengo na Pastor Solange Masengo, gifite insanganyamatsiko igira iti "Love in Action – Urukundo mu bikorwa", ishingiye ku ijambo riboneka muri 1 Yohana 3:18, rihamagarira Abakristo kugaragaza urukundo mu bikorwa aho kuruvugisha amagambo gusa.
Biteganyijwe ko hazabaho gahunda zitandukanye zigenewe ibyiciro byose by’abitabira. Harimo Pastors Seminar, izahuriza hamwe abashumba n’abayobozi b’amatorero mu nyigisho zigamije kubongerera ubushobozi mu murimo bakora.
Hazanaba Worship Leaders Training, aho abayobozi b’amatsinda yo kuramya bazahabwa amahugurwa agamije kubafasha kurushaho kunoza umurimo wo kuramya no guhimbaza Imana.
Abana na bo ntibazibagirana, kuko hateganyijwe Vacation Bible School (VBS), gahunda ibateganyiriza inyigisho za Bibiliya zibafasha gukurira mu kwizera binyuze mu buryo buboroheye.
Buri mugoroba kandi hazajya habaho Revival Gatherings, ibiterane by’ububyutse biteganyijwe gutangira saa 9:30 z’amanywa (3:30 PM), bikazaba umwanya wo kuramya Imana, kwakira inyigisho no gusenga.
Africa Ignite Connection 2026 izitabirwa n’abigisha b’Ijambo ry’Imana bazaba baturutse mu bihugu bitandukanye, barimo Apostle Alex Mitala (Uganda), Bishop Kepha Nyamweya OMAE (Kenya), Pastor Stacy Collins (Leta Zunze Ubumwe za Amerika) na Rev. Dr. Antoine Rutayisire (Rwanda).
Abategura iki giterane bavuga ko kigamije gukomeza kubaka ubufatanye hagati y’Abakristo bo muri Afurika no hanze yayo, guteza imbere urukundo rugaragarira mu bikorwa no gufasha abantu kuvugururwa mu buzima bwabo bwa buri munsi binyuze mu Ijambo ry’Imana.
Africa Ignite Connection imaze kuba kimwe mu bikorwa ngarukamwaka bya CityLight Foursquare Church, ikaba ikomeje gufasha abantu bo mu nzego zitandukanye kongera ukwizera.
Africa Ignite Connection 2026 izahuza Abakristo mu giterane cy’inyigisho n’ububyutse
