Ubwo bari bari kuri uru Rwibutso rwa Jenoside yakorewe Abatutsi rwa Kigali ruri ku Gisozi, basobanuriwe amateka ya Jenoside yakorewe Abatutsi mu 1994, ndetse n’urugendo rw’u Rwanda rwo kongera kubaka ubumwe n’ubwiyunge.

Aba bashyitsi bagera kuri 130, barimo urubyiruko, abashumba n’abakozi b’Imana baturutse mu Rwanda, Malawi, Uganda, Kenya, Tanzania, Ghana na Zambia, bari mu Rwanda mu giterane cyateguwe na Revival Palace Community Church ikorera mu Bugesera, ku bufatanye na A Light to the Nations Africa Ministries.

Igiterane cya Breakout Your Limits 2026 cyatangiye ku wa 10 Kanama kikazasoza ku wa 16 Kanama 2026, gifite insanganyamatsiko igira iti “Breakout Your Limits – Breaking the Chains of Poverty Through Faith, Leadership and Entrepreneurship” (“kurwanya imipaka ikubuza gutera imbere – gucagagura iminyururu y’ubukene binyuze mu kwizera imana, ubuyobozi no kwihangira imirimo.”)

Ni igiterane cyari kigamije gufasha urubyiruko gutsinda ubukene, ubushomeri n’izindi mbogamizi zirubuza gutera imbere binyuze mu kwizera Imana, ubuyobozi, kwihangira imirimo no gukoresha neza umutungo.

Haguma Jean Claude, uyobora urubyiruko muri Revival Palace Community Church mu Bugesera, yavuze ko gusura Urwibutso rwa Jenoside rwa Kigali byari mu bikorwa byateguwe kugira ngo abitabiriye icyo giterane batahe bafite ubumenyi burenze ku mateka y’u Rwanda n’akamaro k’ubumwe.

Aganira na Paradise yagize ati: “Aba ngaba ni urubyiruko, ni abashyitsi b’urubyiruko batandukanye baje mu guterane cya Break Your Limits gitegurwa n’itorero Revival Palace Community Church ku bufatanye n’umuryango w’Ivugabutumwa wa A Light to the Nations Africa Ministries.

Kimwe mu bintu byatumye duhitamo kubazana, ni uko mu ntego z’iki giterane harimo kubaka ubumwe bw’itorero, ndetse no kugira Abakristo b’abaturage beza b’ibihugu barimo. Ibyo rero twasanze bidashoboka mu gihe abantu badasobanukiwe neza icyo kugira ubumwe bivuze, ndetse n’icyago kizanwa no kuba nta bumwe buhari mu bantu.

Bityo rero, twahisemo ko basura Urwibutso rwa Jenoside yakorewe Abatutsi rwa Kigali ku Gisozi, kugira ngo basobanukirwe ikibaho iyo ubumwe butakaye, ndetse n’uburemere bishobora kugira ku muryango w’abantu.”

Yavuze ko hari n’abashyitsi bari bageze mu Rwanda bwa mbere bafite ishusho itandukanye n’u Rwanda rwo muri iki gihe.

Ati: “Icya kabiri, ni uko ababaga bageze mu Rwanda bwa mbere bajyaga batubwira yuko bari bafite ishusho itandukanye y’u Rwanda nyakuri rw’uyu munsi, bakumva ko Abanyarwanda turi abagome, cyangwa ko mu Rwanda tugira amoko, cyane cyane ko mu bihugu bitandukanye baba bafite amoko.

Twabasobanurira ko mu Rwanda nta moko agihari, ko abantu atari abicanyi, bakagorwa no kubisobanukirwa kubera ko bazi amateka ya Jenoside yakorewe Abatutsi ariko ntibasobanukirwe ko byari Jenoside yateguwe, ndetse bakamenya n’uruhare Itorero ryagize mu guteshuka ku nshingano yo kubaka ubumwe mu bayoboke baryo.”

Haguma yavuze ko uruzinduko rwari rugamije no gufasha aba bashyitsi kumenya uruhare indangagaciro za Gikristo zagira mu kubaka amahoro n’ubumwe.

Ati: “Rero abo turi kumwe aha ngaha, ni abapasitoro, ni urubyiruko turi kumwe rwaturutse mu bihugu bitandukanye, ni abakozi b’Imana mu nzego zitandukanye.

Kwari ukugira ngo bumve uburyo indangagaciro za Gikristo zishobora kwifashishwa mu kwimakaza amahoro ndetse n’ubumwe mu iterambere rirambye ndetse n’imibereho myiza mu bihugu baturukamo;

Bakomeza kuba umuyoboro wo gukwirakwiza ubutumwa bwiza, ndetse bagakomeza no kubona ishusho nyayo y’icyo u Rwanda ari cyo uyu munsi, bitandukanye n’ishusho bari bafite mbere yo kuza, yaba iyo baba barabwiwe cyangwa iyo baba barasomye mu binyamakuru bimwe na bimwe biharabika cyangwa ntibinavuge ukuri guhari mu Gihugu.”

Yongeyeho ko abitabiriye iki giterane bari bateganyirijwe gusubira mu bihugu byabo ku wa 16 Kanama, ariko ko mbere yo gusoza amasomo bahisemo kubanza kubereka aya mateka.

Ati: “Icyo giterane cyabayeho kuva ku itariki 10 kugera ku wa 16 ni bwo kizarangira, nyuma ni bwo bazasubira mu bihugu byabo. Ariko twifuje ko mbere yo gusoza amasomo biga baza gufata andi masomo bakabona gusubirayo.

Bizabafasha guhuza amasomo bize n’inkuru z’u Rwanda, bige icyo u Rwanda twigira kuri Jenoside, harimo kubabarira n’ubumwe, babone uruhare byagize mu kubaka u Rwanda uku rumeze, babyigane na bo.”

Umunyamahanga wo muri Zimbabwe yavuze ko amateka yamukoze ku mutima

Bishop Gift Mukuka wo muri Zimbabwe, umwe mu bashyitsi basuye uru rwibutso rwa Jenoside rwa Kigali, yavuze ko yatangajwe n’amateka y’u Rwanda n’ibyo yari asanzwe azi.

Yagize ati: “Nishimiye ko natumiwe hano. Natangaye cyane ubwo namenyaga amateka atandukanye n’ayo nari nzi ku Rwanda. Ubutumwa natanga ni ubwo gukomeza inzira y’amahoro. Si byiza ko bisubira. Abanyarwanda bafatanye. Nakwifuriza abantu bose kwigira ku Rwanda kubana mu mahoro kandi bakiga kubabarirana.”

Pastor wo muri Uganda: “Nakutse umutima”

Pastor Zipporah Kuteesa wo muri Uganda, utuye Entebbe, yavuze ko uru ruzinduko rwamukoze ku mutima cyane, ku buryo yari afite amarangamutima menshi nyuma yo kumenya uburemere bw’ibyabaye mu Rwanda.

Yagize ati: “Ndumva mfite byinshi byo kuvuga, kuko byansajije. Ndi uwo muri Entebbe muri Uganda. Mbere na mbere, no guhumeka ubwabyo ndi hano biri kuntera kumva mfite amarangamutima.

Ariko ni amarangamutima atari meza, kuko nari mbabaye cyane, numvaga mfite agahinda kenshi, haba ku bantu bishwe ndetse no ku bantu bakiriho babuze ababo. Nubwo bwose hari ibyasanwe, ibyubatswe, hakaba hari iterambere, rwose mbabajwe n’ibyabaye.

Nk’umuntu wasobanuriwe ibi bintu, nibazaga ibibazo byinshi. Nari mfite amatsiko, ariko nakuwe umutima n’ukuntu ububi nka buriya bwabaho mu gihe gito kandi bukabaho bukozwe n’ikiremwa muntu. Ni ukuri nakutse umutima.”

Kuteesa yavuze ko rimwe mu masomo akomeye avanye mu Rwanda ari uko Abanyafurika ubwabo bakwiriye kuba igisubizo cy’ibibazo by’umugabane wabo.

Ati: “Isomo nize ni uko Afurika ari yo byiringiro bya Afurika. Ibyo ni Dr. Ian Tumusiime ukunda kubishimangira, avuga ko dukwiriye kubishyira mu bikorwa. Ni twe byiringiro byacu.

Abantu batugaragiye, sinshaka kubavugaho, ariko ntibumva neza uko tubayeho. Akenshi abo bazungu bazaga bashaka kudutandukanya kuruta kutwunga. Afurika rero nidukorera hamwe tukubakana, tuzagera kure.”

Yavuze ko amashusho n’amateka yabonye ku rwibutso byamufashije kumva neza uko amacakubiri yagize ingaruka ku Rwanda.

Ati: “Nabonye amashusho, amafoto, mbona uko u Rwanda rwari rumeze mbere y’ubukoroni na nyuma yaho. Icyo bakoze ni ukubiba amacakubiri. Nyamara Abanyafurika ubwabo baramutse bunze ubumwe bakora ibintu bikomeye.”

Uyu mushumba kandi yahaye ubutumwa bw’umwihariko urubyiruko, asaba abakiri bato kwirinda gukoreshwa mu bikorwa bibi.

Ati: “Mbere na mbere nishimiye kandi kuza hano, nkaba ndi urubyiruko. Ubutumwa natanga ni ukubwira urubyiruko ko hari abantu barubibamo ibitekerezo bidakwiriye, bakarukoresha mu nyungu zo kurubibamo imyumvire idakwiriye. Nyamara, bakeneye kwiga, bakaba abantu batanga ibyiringiro kandi biteza imbere.

Ubona ko abakiri bato bakoreshwa mu bikorwa bibi, bagashyira mu bikorwa imyanzuro mibi y’abantu bakuru bayoboye.

Abakiri bato bakunda gushukwa byoroshye. Ndashimira rero abahisemo kutuzana nk’urubyiruko. Kandi nizera ko dufite ahazaza heza. Ni ukuri byadukoze ku mutima, kandi tuzakora ibintu bikomeye abakuru bacu batakoze, cyane ko abaturuta batwizereramo. Twirinde ibiyobyabwenge n’inyigisho zitari zo.”

Breakout Your Limits, igamije kurenga imipaka y’ubukene

Iki gikorwa cyateguwe na Revival Palace Community Church rikorera mu Bugesera, ku bufatanye na A Light to the Nations Africa Ministries, si uruzinduko rw’urwibutso gusa.

Abateguye Breakout Your Limits 2026 bemeza ko intego ari ukubaka urubyiruko rw’Afurika rushobora gutekereza kure, rukagira kwizera Imana ariko rukagira n’ubumenyi bufatika bwo kwiteza imbere.

Mu gitondo, abitabiriye bahabwaga amahugurwa ku bijyanye n’ubuyobozi, kwihangira imirimo, imari, gutegura ubucuruzi, guhanga udushya, ikoranabuhanga mu bucuruzi, kumenyekanisha ibikorwa, kuvumbura impano n’umuhamagaro ndetse no kubaka imikoranire hagati y’urubyiruko rwo mu bihugu bitandukanye.

Mu mugoroba habaga amateraniro arimo kuramya no guhimbaza Imana, ubutumwa, amasengesho, ubuhamya no gusengera abafite ibibazo bitandukanye.

Muri iki giterane kandi habaye ibiganiro byiswe Celebrity Conversations, aho bamwe mu bahanzi n’ibindi byamamare basangije urubyiruko ubuhamya bwabo ku rugendo rw’ubuzima, kwizera Imana, gutsinda ibigeragezo no kugera ku nzozi.

Abatanze ibiganiro barimo Pastor Dr. Ian Tumusiime, Umuyobozi Mukuru wa Revival Palace Community Church na A Light to the Nations Africa Ministries, Meya w’Akarere ka Bugesera Richard Mutabazi ndetse na Dr. Edouard Munyaburanga, umushoramari akaba na nyiri Highland School n’Umuyobozi mushya w’Urugaga rw’Abikorera (PSF) mu Bugesera.

Iki gikorwa kandi cyari kirimo ibikorwa byo gufasha abaturage, birimo gutanga umusanzu wo kwishyurira imiryango itishoboye Mituweli, mu rwego rwo kubafasha kubona serivisi z’ubuvuzi.

Abitabiriye bazataha bafite ubumenyi bwo kwihangira imirimo, ubushobozi bwo kuba abayobozi beza, kwizera Imana gukomeye ndetse n’umurava wo kugira uruhare mu iterambere ry’ibihugu byabo.

Uruzinduko rw’Urwibutso rwa Jenoside rwa Kigali kuri uyu wa 15 Kanama rwabaye igice cy’ingenzi cy’urwo rugendo, kuko abashyitsi bahuje amasomo y’ubuyobozi, ukwizera n’ubumwe biga muri iki giterane n’amateka y’u Rwanda, basobanukirwa ko kubaka amahoro no kurinda ubumwe bisaba uruhare rwa buri wese.

Itorero Revival Palace Bugesera n’urubyiruko rwo mu bihugu 6 basuye Urwibutso rwa Jenoside rwa Kigali