Ku wa Gatanu tariki ya 28 Kanama 2026, muri Dove Hotel mu Mujyi wa Kigali, habereye ikiganiro n’itangazamakuru cyateguwe na Sion Fondation, mu rwego rwo gutegura igiterane cya Rabagirana Festival 2026 kizabera muri Bugesera ku Cyumweru tariki ya 6 Nzeri 2026.
Iki gikorwa cyahurije hamwe abayobozi, abafatanyabikorwa, abahanzi ndetse n’itangazamakuru, basobanura intego z’iki giterane n’andi mahirwe azatangwa binyuze mu mishinga itandukanye izakomeza gushyigikira imibereho n’iterambere ry’Abanyarwanda.
Muri iki Kiganiro, Peace Nicodeme Nzahoyankuye uyobora Sion Fondation yasobanuye byinshi kuri iki giterane gitegerejwe muri Bugesera.
Muri iki kiganiro, hagaragajwe ko Rabagirana Festival atari igiterane cy’umuziki wa Gospel gisanzwe ahubwo ko ari urubuga rwo kugeza ku Banyarwanda ubutumwa, ubufasha n’amahirwe afatika mu buzima bwa buri munsi.
Chancern International yatangaje gahunda yo gufasha abarenga 1,000 kwiga
Umwe mu bafatanyabikorwa bakuru ba Rabagirana Festival ni Chancern International, umuryango wasobanuye birambuye umushinga wo gufasha Abanyarwanda kubona amahirwe yo kwiga muri kaminuza no mu mashuri y’imyuga.
Uyu mushinga uteganyirijwe gufasha abanyeshuri barenga 1,000, mu gihe Chancern International yatangaje ko kugeza ubu abarenga 9,000 bamaze gufashwa binyuze muri gahunda nk’iyi.
Mu mashuri makuru na kaminuza biri muri gahunda yo gukorana na Chancern International harimo INES Ruhengeri, UTAB, UCK, CUR, University of Gitwe, East Africa University, n’amashuri y’imyuga nka Inkuru Nziza TVET na Masaka Incubation, n’andi akomeje kwiyongeramo.
Uhagarariye Chancern International yasobanuye ko urbatazakorana n’aya mashuli 23 gusa kuko bakomeza gukora isuzuma ry’amashuri hagendewe ku byo igihugu gishyira imbere (priorities)kugira ngo hatoranywe ibigo bihuye na gahunda y’iterambere ry’igihugu.
Amahirwe ntabwo agenewe abadafite akazi gusa
Kimwe mu bibazo byibazwaga ni ukumenya niba umuntu ufite akazi kamuhemba amafaranga ashobora kugira amahirwe yo gufashwa kwiga. Uhagarariye Chancern International yasobanuye ko iyi gahunda itagenewe gusa abantu badafite akazi.
Umuntu ufite akazi ashobora gutoranywa igihe yujuje ibisabwa kandi akazi ke kataba imbogamizi ku myigire ye. Yavuze ko hari amashuri atanga gahunda zo kwiga mu mpera z’icyumweru cyangwa nijoro, bitewe na gahunda ya kaminuza cyangwa ishuri umuntu azaba yahisemo.
Aya mahirwe agamije gufasha abantu bafite imyaka iri hagati ya 18 na 35. Muri iyi gahunda, abifuza kwiga imyuga bazahabwa amahirwe yo kwiga amasomo ashobora kumara amezi atatu cyangwa atandatu, mu gihe abifuza kwiga amashuri makuru na kaminuza bashobora kubona gahunda zimara hagati y’imyaka ibiri n’ine, bitewe n’ishami n’ikigo bazaba baratoranyijwe.
Umuntu usaba aya mahirwe azasabwa gutanga ibyangombwa birimo Accreditation letter, CRB Report n’ibindi byangombwa bisabwa mu igenzura no gutoranya abazahabwa ubwo bufasha.
Umunyeshuri azagira uruhare mu kwishyura nyuma yo gufashwa
Mu gusobanura uburyo iyi gahunda ikora, uhagarariye Chancern International yavuze ko umunyeshuri uzatoranywa agirana amasezerano n’umuryango.
Umunyeshuri watoranyijwe azaba asabwa commitment y’amafaranga ari hagati ya 5,000 na 10,000 Frw ku kwezi, ayo mafaranga akazajya akurwa mu bwishyu bwateganyijwe muri gahunda.
Nyuma yo kurangiza amashuri, hari n’ubundi buryo bwo kwishyura bwashyizweho. Umuntu uzaba yarafashijwe azajya atanga hagati ya 10% na 15% by’umushahara we, kugira ngo ayo mafaranga azifashishwe mu gufasha abandi banyeshuri badafite ubushobozi bwo kwishyura amashuri. Uwishyuriwe n’uyu mushinga azishyura amafaranga atariho inyungu ku nguzanyo
Iyi gahunda yo kwishyura ikorwa mu gihe kiri hagati y’imyaka 5 n’imyaka 10, bitewe n’amasezerano n’umunyeshuri. Ibi bivuze ko gahunda idashingira gusa ku gutanga ubufasha, ahubwo inateganya uburyo abazaba bamaze kubona ubushobozi bazagira uruhare mu gufasha abandi kubona amahirwe nk’ayo.
Abazitabira Rabagirana Festival bazahabwa ubufasha mu bwisungane
Mu yandi makuru y’ingenzi yatangajwe muri iki kiganiro, Sion Fondation n’abafatanyabikorwa bayo bagaragaje ko igiterane cya Rabagirana Festival kizabera i Bugesera kizaba gifite umwihariko wo gufasha abantu mu bijyanye n’ubwiteganyirize.
Mu giterane cya Bugesera, abantu 2,000 bazishyurirwa EjoHeza, mu gihe abandi 1,000 bazishyurirwa Mutuelle de Santé.
Abategura iki gikorwa bavuze ko iyi gahunda izakomeza no mu bindi bice by’igihugu uko Rabagirana Festival izagenda izenguruka mu turere dutandukanye.
Abahanzi basabye itangazamakuru guteza imbere Gospel
Muri iki kiganiro kandi harimo abahanzi batandukanye, barimo MD (Mugemana Dieudonné), umwe mu baraperi bazwi mu muziki wa Gospel, by’umwihariko mu rubyiruko.
Chancern international yiyemeje guhindura ubuzima bw’abanyarwanda binyuze mu kwiga.
MD yasabye itangazamakuru kugira uruhare mu guteza imbere no gukundisha Abanyarwanda umuziki wa Gospel. Yagaragaje ko itangazamakuru rifite uruhare rukomeye mu kugeza umuziki w’abahanzi ku bantu benshi no kuwufasha kugera ku rubyiruko.
Gaby Kamanzi yashimiye Sion Fondation
Undi muhanzi uri mu bitabiriye iki kiganiro ni Gaby Irene Kamanzi, umwe mu bahanzikazi bazwiho kugira ijwi ryihariye kandi rikundwa n’abakunzi b’umuziki wo kuramya no guhimbaza Imana.
Gaby yashimiye Sion Fondation ku bw’icyo gitekerezo cyo gutegura ibiterane bizenguruka mu turere dutandukanye tw’igihugu.
Yavuze ko ibi biha abahanzi amahirwe yo guhura imbonankubone n’abakunzi babo, cyane cyane abo usanga basanzwe babazi cyane cyane binyuze kuri Televiziyo cyangwa ku mbuga nkoranyambaga ariko batarabona amahirwe yo kubabona imbonankubone.
Beta Paints na yo iri mu bafatanyabikorwa
Muri Rabagirana Festival harimo n’abandi bafatanyabikorwa batandukanye, barimo Beta Paints, uruganda rukora rukanacuruza amarangi.
Uhagarariye Beta Paints, Pierre Imanishimwe, yari mu bitabiriye iki kiganiro. Beta Paints ikomeje kugaragara mu bikorwa byo gushyigikira ibikorwa bitandukanye bya Gospel, birimo ibitaramo n’izindi gahunda zigamije guteza imbere umuziki wa Gospel n’abawukora.
Rabagirana Festival i Bugesera
Nyuma y’ibisobanuro byatanzwe muri iyi Press Conference, amaso ahanzwe ku giterane cya Rabagirana Festival kizabera mu Karere ka Bugesera ku Cyumweru tariki ya 6 Nzeri 2026.
Iki gikorwa gitegerejwemo umuziki wo kuramya no guhimbaza Imana, ubutumwa ndetse n’amahirwe atandukanye ku bazacyitabira.
Ku ruhande rwa Sion Fondation n’abafatanyabikorwa bayo, igitekerezo ni ugukomeza gukoresha Rabagirana Festival nk’urubuga rutahuza abahanzi n’abakunzi babo gusa, ahubwo runatanga amahirwe y’uburezi, ubwiteganyirize n’iterambere ry’imibereho.
Rabagirana Festival izakomereza no mu tundi turere tw’igihugu, aho ibikorwa nk’ibi bizagenda bihuzwa n’ibikenewe n’abaturage bo muri buri gace.
