× Home Ministries Choirs Pastors Bible Entertainment Development Health Love Fashion Music

Agape Choir igiye gutaramana na Papi Clever na Dorcas muri “Dushime Uwiteka Live Concert Season 2”

Category: Choirs  »  1 month ago »  Jean D’Amour Habiyakare (Amourkare)

Agape Choir igiye gutaramana na Papi Clever na Dorcas muri “Dushime Uwiteka Live Concert Season 2”

Korali Agape, ikorera mu Itorero EPR Kiyovu, igiye gukora igitaramo cyo kuramya no guhimbaza Imana cyiswe “Dushime Uwiteka Live Concert — Season 2”, aho izifatanya n’abaramyi n’amakorali batandukanye, barimo Papi Clever na Dorcas.

Iki gitaramo giteganyijwe ku Cyumweru tariki ya 18 Ukwakira 2026, muri Kigali Serena Hotel, guhera saa 2:00 z’amanywa. Kwinjira muri iki gitaramo bizaba ari ubuntu.

Chorale Agape yatangaje ko iki gitaramo kizaba umwanya wo kuramya Imana, kuyishimira no gutega amatwi Ijambo ryayo, aho Abakristo bazahurira hamwe bakazamura amajwi yabo mu guhimbaza Uwiteka.

Mu bazifatanya na Chorale Agape harimo Papi Clever na Dorcas, abaramyi bamaze kumenyekana mu muziki wa Gospel mu Rwanda. Aba bombi bazaba bari mu bashyitsi b’imena bazafasha mu kuramya no guhimbaza Imana.

Harimo kandi Jehovah Jireh Choir, Chorale Bethel yo muri EPR Paroisse Kiyovu ndetse na Believers Worship Team. Aba baramyi n’amakorali bazafatanya na Chorale Agape mu gutanga umwanya wihariye wo kuramya no guhimbaza Imana.

Iki gitaramo kandi kizitabirwa na Rev. Dr Antoine Rutayisire, wateganyijwe nk’umushyitsi uzatanga ubutumwa bw’Ijambo ry’Imana muri iki gikorwa.

Insanganyamatsiko y’iki gitaramo ishingiye muri Zaburi 143:5-6, aho umwanditsi wa Zaburi agaragaza gutekereza ku mirimo y’Imana no kuyihamagara mu gihe cy’amakuba, agira ati: “Ntekereza iminsi ya kera, nzirikana ibyo wakoze byose, ntekereza imirimo y’amaboko yawe. Nkuramburira amaboko yanjye, umutima wanjye ukugirira inyota nk’igihugu cyumye.”

Chorale Agape yateguye iki gitaramo mu rwego rwo guhuriza hamwe abakunda kuramya no guhimbaza Imana, bagashimira Uwiteka ku byo yabakoreye ndetse bakanakira ubutumwa bwubaka ukwizera.

Ubutumwa bwa Chorale Agape burahamagarira abantu kuzitabira iki gitaramo bari kumwe n’imiryango n’inshuti, bakifatanya mu kuramya no guhimbaza Imana.

“Dushime Uwiteka Live Concert — Season 2” izabera muri Kigali Serena Hotel ku Cyumweru tariki ya 18 Ukwakira 2026, guhera saa 2:00 z’amanywa, kandi kwinjira ni ubuntu.

Chorale Agape, Papi Clever na Dorcas, Jehovah Jireh Choir, Chorale Bethel, Believers Worship Team na Rev. Dr Antoine Rutayisire ni bamwe mu bazaba bahuriye muri iki gikorwa gishingiye ku kuramya, gushima Imana no kumva Ijambo ryayo.

Tanga igitekerezo kuri iyi nkuru

pre-moderation

This forum is pre-moderated: your contribution will only appear after being validated by an admin.

Who are you?
Your post

To create paragraphs, just leave blank lines.

Ibitekerezo Byatanzwe

indirimbo nshya ya 2026

Cyanditswe na:   »   Kuwa 11/10/2026 06:40